قرارات ادارة كلية تجاره القاهره بشأن الانتساب ومجموعات الانتظام مع عدم استبعاد الغاء السنة

[center]من فترة كنا نزلنا على الموقع أخبار عن قرارات اجتماع المجلس الاعلى للجامعات لتجنب انتشار انفلونزا الخنازير زي قرار الغاء محاضرات انتساب او قرار تقسيم مجموعات انتظام ، طبعا كل هذه القرارات كانت مازالت تحت الدراسة ، واحنا نزلنا الاخبار بمجرد ما بدأ التفكير في القرارات ، لذلك كانت التساؤلات كتيرة عن هذه الاخبار وعن كيفية تنفيذها وتطبيقها ، ولحد امبارح اي حد كان بيسألني كنت بقوله لسه مفيش تفاصيل وحتى الان دي مجرد افكار طرحت في اجتماعات ولم يتم حتى الان التفكير جديا في كيفية تنفيذ القرارات لذلك حتى الان احنا ماشين على نفس نظامنا القديم لحين صدور تفاصيل جديدة عن البدأ جديا في تنفيذ هذه القرارات.

امبارح عقد سيادة الرئيس حسني مبارك اجتماع مجلس وزراء ، وشدد على عمل اي حاجة لمنع انتشار المرض ده عندنا بأي شكل ، حتى لو اضطرينا اننا نجمد التعليم السنادي بمعنى ان الناس تاخد اجازة العام الدراسي ده كله ونبدأ ندخل الدراسة تاني السنة الجاية ان شاء الله.

طبعا ده هيكون قرار جريئ جدا من سيادته ممكن ينجي مصر من كارثة حقيقية خصوصا ان المرض ده لو انتشر هيقضي على ملاين وملاين من المصرين على حسب الدراسات ، وعرض وزير التعليم ووزير التعليم العالي على الرئيس الخطط البديلة في حالة اغلاق المدارس والجامعات وذلك باستخدام القنوات التلفزيونية التعليمية ، بس بأي حال من الاحوال احنا مازلنا حتى هذه اللحظة مش محتاجين القرار ده ، لان الدكتور حاتم الجبلي وزير الصحة صرح بعد الاجتماع ان لجنة المتابعة الوزارية عرضت الموقف بالكامل على الرئيس والاجراءات الاحترازية اللي عملوها في ضوء التركيز على العملية التعليمية بالمدارس والجامعات ، وانهم في الاجتماع راجعوا اللي حصل في نصف الكرة الجنوبي خلال فترة الشتاء ولقوا ان مفيش نمض ثابت للمرض ده يعني انتشر في تشيلي بنمط مختلف تماما عن انتشاره في جنوب افريقيا ، بس احنا حتى الان في اطار امن

وبناءا عليه عقد مجلس عمداء جامعة القاهرة اجتماع وفتحوا مرة اخرى ملف قررات المجلس الاعلى للجامعات وفي هذه المرة اتكلموا بشكل جدي في تنفيذ هذه القرارات للعام الدراسي الجديد وعدم تأجيلها لاعوام سابقة كما كان متوقع ، وكل كلية بدأت تفكر ازاي تنفذ القرارات دي طبقا لظروفها

بالنسبة لكلية تجارة قرروا انهم يلغوا محاضرات انتساب ويحولوه الى تعليم الكتروني ، طبعا الفكرة دي كانت مقترحة من زمان واحنا نزلنها على الموقع مجرد ما فكروا فيها وكده كده كان مقرر انها تتعمل ، بس كانوا مأجلينها لحد ما كل حاجة تتظبط ، لكن بعد اجتماع الرئيس بالامس ، قرروا النهاردة انهم يطبقوا النظام ده من العام الدارسي القادم 2009/2010 ، وباذن الله نظام المحاضرات هتبقى عن طريق قناة زي قناة التعليم المفتوح بتاعة جامعة القاهرة ، هننزلكوا جدول مواعيد المحاضرات وتابعوها على التلفزيون ، وكمان في فكرة الفديو كونفرانس ، يعني الدكتور يلقي المحاضرة وهو قاعد قدام كمبيوتر ، وكل طالب بيحضر قاعد قدام جهاز عليه نت وبيتفرجوا على المحاضرة لايف ، وفي فكرة تالتة ان المحاضرات تتعمل بشكل ورق ويتباع في الجامعة ، يعني من الاخر المحاضرات بتاعتهم هتبقى مودرن ، هما ماشين في الـ3 أفكار في نفس الوقت ، وتابعوا معانا التفاصيل على الموقع

نيجي لانتظام

الخبر اللي كنا منزلينه زمان ان المجموعات هتتقسم اكتر من كده ، ولما كان حد بيسألني كنت بقول ان الكلام ده ممكن يتنفذ في اي كلية تانية بس عندنا في تجارة مستحيل لان طبيعة كلية التجارة مختلفة عن اي كلية تانية ، فهما قرروا انهم يخلوا المجموعات زي ما هي ، كل طالب في نفس مجموعته زي ما هو ، مع تقسيم المجموعة الواحدة لنصين ، كل نص بياخد محاضرات في مدرج مختلف ومواعيد مختلفة بس في الاخر يظل الطالب مقيد في نفس المجموعة ، والامتحانات بتبقى واحدة للمجموعة الواحدة


دي الاخبار اللي موجودة لحد دلوقتي

انا عارف ان في تساؤلات كتيرة لاي حد يقرا الموضوع ده ، بس يا جماعة احنا بنزل الاخبار اول باول ، يعني مبنستناش لما القرار يكتمل عشان ننزله ، احنا بنزل الخبر بمجرد صدوره ، يعني النظام نفسه له ناقصه تفاصيل كتيرة ، بس تابعوا معايا وان شاء الله اي جديد هينزل على طول في الموضوع ده